غفير القصر

غفير القصر اهم من الملك والقصر والحاشيه
يتغير عليه وزرا يتغير عليه دواوين
وناس قاعده وناس ماشيه
وهو الشاهد الاوحد علي الاحداث
هو اللي بأديه العدل
وهو اللي ف ايديه الحصر
هو مراية التواريخ
وهو فيلسوف العصر
وانت الفارس الخيبان
لما الارض ضاقت بيك طلعت جبان
هربت ف قطر احلامك وسبت البيت
اميرة القصر ضحكتلك رميت اللي ف ايديك وجريت
ياواد ال ف ايديك كان نور
اميرة القصر مش احلي بنات الحور
ولا انت الفارس الاوحد ولا الددبان
وسور القصر طول عمره بيتفرج علي الفرسان
ييجوا كل يوم يتلموا بره الخط
وعمر ماحد فكر فيهم انه ينط
يباتوا زي ما يباتوا
يهاتوا زي ما يهاتوا
ويرجع تحت رجليها ويوهب عمره وحياته
وبرضو تقوله مش عايزاك
لو حبك غفير القصر كان عداك
كان وداك لبلكونة الاميره تشوف
من جوه بيبقي اللعب ع المكشوف
يعني هتكدب الكدبه ال كل الناس بتكدبها
وتحفظها وترسمها وتكتبها
هتقول انك انت ال اعتليت السور
وجوعت شهور وعومت بحور عشان توصل لاحلامك
ساعتها الناس هتمشي وراك وهتأمن علي كلامك
وبالنسبه لغفير القصر يتغير
زهقنا خلاص من العواجيز
نشوفلك شاب وصغير
عشان يتربي علي ايدك
يا فاكر غربتك عيدك
مفيش في الغربه غير سهرك
متغركش انوارها دي غربه تقيله وبخليه
هتنش لحم ايامك وتديك خيرها بالتيله
مفيش في الغربه يابني الغربه غير الزيف
في وقت السرقه ليه يا اهبل عملت شريف
ورثت من امك الاخلاص
يا ولد الناظره مش كل الخدود تتباس
بتعافر لوحدك ضد جهل الناس وكره الناس
وعايش الغربه بتدور علي سندك
ما لو حبك غفير القصر كان نجدك
كان عدلك علي القبله وردك في الآيات السهو
كان عداك من السراديب عشان توصل لباب البهو
وتتمني فنون الذكر والحضره كما الدراويش
مفيش مليم بييجي يا ولدي بالسرقه وخيره يعيش
يا شادد بؤجتك بأيديك
صلاتك باطله يابن الناظره وصيامك فطور مبتور
ووقت السيف مايطلع يابني كل الناس هتشهد زور
وخلي الغربه تشفعلك
واكتب شعر واتمرمغ وشوف مين اللي يسمعلك
يا شادد بؤجتك ف ايديك علي بوارج
خلاص بطلت حكايه عقد في الخارج
حبيبتك مش هتستناك
لو حبك غفير القصر كان إداك
مش كل الكلام يتقال ومش كل الودان تسمع
ولو مجبورك علي العيبه نصيحه مني تستمتع
غفير القصر مش هيهددك بالسر
هتفضل طور في ساقيه غربتك بتدور محلك سر
سنين عمرك هتفرك تحت عتب الباب
وتصحي فجأه فتلاقي أن شعرك شاب
هتحن لزمان فايت
طعم الفرح مهما بيخلي في الغربه طبيخ بايت
ووجع الغربه زي الدبش
ياواد اللي ماداقش الغربه ماتأدبش
انا الهربان من الخولي ومن غفري
وانا اللي ببات علي عرقي وعلي عفري
غريب ومعاه جواز سفري ومش عاجبه
انا المصري اللي علمته بقي بيرفعلي في حواجبه
انا المصري اللي علم أمتين تقرا
بقيت واقف طابور بالدور عشان اختم ورق هجره
غفير القصر لما ضحكت ماعجبهوش
لما زعلت ماعجبهوش لما نطقت ماعجبهوش
قالي تجيبلي اوراقك واحلامك
ودمغه وحسن سير وسلوك
وقبل الكل هاتلي لسانك المبرد يقف ويقول انا صعلوك
ساعتها أنا قولت ماهجيبهوش
يا مهاجر وسايب حلمها يدبل
صرمت الناقه لاحسن في الحرام تحبل
وتوهت ف غربتك والنوم
قضيت العمر عد نجوم
دي مش نفس النجوم يا اهبل
دي مش نفس السنين والعمر
انا عارفك مشيت مبسوط ودايق المر
لو بايدي لالملك بيوت الحي والونسه
واجيبلك كل احلامك في خيط معقود
عيالك لما بتسافر بيبقي اسمهم ورثه
مفيش فلاح هتطرح ارضه عز وهو مش موجود
غفير القصر غربنا عقود وعقود
بقينا مقطوعين الايد
ومش ذنبي اني حبيتك عشان ترميني للمطاريد
اعيش العمر بتمناكي في الاحلام
ازورك اسبوعين في العام
أشم هواكي ف الافلام واحوشك مهرك الغالي
اقول معلش بكره ارجع والاقي حبيبتي لابسالي
وطبل وزمر وقرايب وهيصه وزينه بتلالي
اتاري العمر بيعدي كلام ف كلام
يابياع السنين قولي اجيبها بكام
غفير القصر بيبيع ابتساماته
وبيوزع علي اللي مصدقين غشه
مابنحسش في وقت الغربه مين ماتوا
ونحسد كل ميت مات علي فرشه
يعدي الموت علي غفر القصور بالدور مايوعظها
ويرمونا في ليل الغربه والتشريده والمنفي
ليالي تمر ولا حدش من النايمين ملاحظها
وابات في الغربه انا سقعان وغيري ف بيتي يتدفي
انا من الناس لو غضبت بتفلت منها ملافظها
وغضب الغربه شارب دمي لا استرجع ولا استكفي
ولا انتم حمل غضب الناس ولا انتم حمل سيل غيظها
ولا اتعلمتوا م الايام و م الدوران و م اللفه
ف الاخر مصيركم تيجوا نفس الشله وبتظهر
ساعتها الشمس والحق اللي بات ضعفان بيستعفي
ساعتها ننصب الزفه ويرجع مُهرنا الحرنان
وننسي أن احنا كنا زمان بنهجر مصر
عشان معرفش يفهمنا غفير القصر