قصيدة الشتا مش ليك للشاعر هشام الجخ
الشتا مش ليك
الشتا للي اتلفوا ببطاطين لابسين لكاليك
شايفين الدنيا قزاز في قزاز
المطرة ما توجعش اللي يشوفها من البرواز
المطرة رصاص لو جت في عنيك
المطرة ف عينهم هم رذاذ
بس ما تتغرّش بالمكشوف
لِف من الناحية التانية تشوف
حتلاقي الواحد لابس صوف زي الحلّوف
ويقول لك ضهري ورجليا وداء الغضروف
واحنا اللي شقينا ف عز البرد جسمنا فاق
ماهو زي ما كان الدفا أرزاق
العفا أرزاق
واهي دنيا مقسمها الخلاق
ناس تدّارَى من المطرة وناس
واقفة بتتفرج في الشبابيك
الشتا مش ليك
.......
الشتا لو ما لقيش الحضن بيبقى مرار
بتحب الشتا على إيه يا حزين؟
وانت حيطانك من قش وطين
ولا عندك خل ولا عندك جار؟
ولا عندك حد يقيد في وقيد ولا حد يقوم يحمي لك نار
بتحب الشتا على إيه يا حمار؟
ده انت بتدارى في قولة آه
وف كام ذكرى وتليفون مركون مش راضي يرن
خليك زي اللامؤاخذة ليلاتي تتوب والصبح تحن
بتحب الشتا؟ ياخي حبك جِن
شتا أيه اللي بيتحب ف وسط الفقر ووسط صوابع إيد سقعانة
المطرة عقارب بتقرّص في كعوب الناس الحفيانة
الشتا مش ليك .. الشتا للناس الدفيانة
أما احنا الشتا بيجيلنا هموم؟
حتجيب من فين حضن يدفيك وتجيب من فين للقلب هدوم؟
ماتقولش كلام مدهون بكلام
البرد بيفرش على أسفلت الفقرا زكام
ويولع شمع في أوضة النوم للبيه
لما انت فقير .. بتحب الشتا على إيه؟
على رعشة جسمك وإديك اللي في جيب مقطوع
برد الفقر وبرد الغِنَى مش نفس النوع
ياك فاكر نفسك (كاظم الساهر) بتصور بقميص مبلول؟
المطرة سيول بتهد بيوت مالهاش أساسات
والله انا شفت بعيني الموت حكايات حكايات
فيه بيوت مسقوفة بجذعين نخل ودروة هيش
سبحان الله
بيجيها البرد يوماتي بموت
وقادرة تعيش
......
كل الذكريات الصعبة كانت في الشتا
أول ميعاد .. ساعة الفراق .. آخر لقا
كأنه فصل مخلوق للشقا
فصل الوجع والذكريات .. فصل الدموع
فصل حرمان.. فصل جوع
أي ذكرى بتوجعك حتلاقي فيها من الشتا
يا إما مطرة .. يا إما برد
يا إما ليل طولان ساعاته تمد مد
يا إما قلب في الطريق مادد إيديه يشحت محبة أي حد
الشتا من دون فصول كل السنة
بيسكت الطير في السما
ولا تلقى عشاق في السكك ولا تلقى ورد
لونه غيم وصوته رعد
الشتا عتمة تدوس ع الناس ومش عاتقة
حتى الفواكه في الشتا حادقة
حتى القمر بيختفي ويخبي إحساسه
سيب الشتا لناسه
أحنا مش ناقصين وجع
الشتا بيدفي بس المعشوقين
ويغفّل وشوشنا ويرسم التجاعيد
اللي بيحبوا الشتا ماشيين ورا الوهم السعيد
وانت حتى الوهم مش عايز يصاحبك
إيه اللي جابك في القصيدة من أساسه
مش قلت لك سيب الشتا لناسه
.......
يا شتا
أحلى ما فيك لمة القصعة ولسعة القالوح في النار
وأمر ما فيك الانتظار
كان ممكن امدح فيك لو كنت خليتها
طلعت لي لسانك مع كل لسعة برد
وكل لحظة وجع
وبنت حبيتها
خلاص يا عم الشتا ما تزقش الأبواب
الشاب شعره شاب
وماعدش يقعد بالحمالات في البيت
فاكرني ولا نسيت؟
أنا اللي كنت زمان بفتح قميص الخلا صدر ودراع مكشوف
أديني لابس صوف
بتدارَى م المطرة
وباقفل الشبابيك
الشتا مش ليك
.......
عظمه
ردحذف