جُـــحَـــــــا - هشام الجخ
شعور سخيف
إنك تحس بإن وطنك شيء ضعيف
صوتك ضعيف
رأيك ضعيف
وإنك تبيع قلمك وإسمك
ما يجيبوش حق الرغيف
قالك أصل اتنين وشبكو
اللى كان من تحت ميت
واللى كان من فوق كفيف
دا شعور سخيف
إنك تكون رمز الشحاتة
تبنى مبنى للشحاتة
تعمل وزراة للشحاتة
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى أنا اتغميت
عايش بدون لازمة
ولما مرة شكيت
إدونى بالجزمة
هاتولنا و جيبولنا و ادونا ودونا
هنجيب منين نديك
طافح يا بلدى غدايا و لوعتى غدايا
و آدى الأحبه التفوا و اتجمعوا عدايا
بتأكلينى سباخ
إن كان دة تقل ودلع
بزيادة دلعك باخ
ولا شفت فيكى ترف
كل اللى فيكى قرف
واللقمة بإهانة
بتخلفينا ليه
لما انتى كارهانا
وكل يوم المية تقطع
يعنى ايه لما اشتكى غلو الفاتورة
يقولو تشكى بس تدفع
وأما نفط الأمة ثروة بتتسرق
وأما جلادك على ولادك بيبطش
وأما علمك ما يلاقيش يآكل فيطفش
ويعنى ايه لما ابقى ماشى فى حالى اتشد اشتباه
يعنى ايه لما اتحبس أربع سنين حبس احتياطى
حبس اعتباطى
يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته
ومكان ما ترسى مركبك بابنى شطوطى
أنا كنت جيشك لما مماليلك باعوكى
وكنت يوسف لما عشتى سنين عجاف
وضلوعى دى اللى فى معركة قادش حموكى
وشفايفى دى اللى ما بطلتش فى يوم هتاف
وكل يوم عشتيه أنا اتغذبت بيه
من امتى كانوا الحرس هما اللى باقينلك
بعتينى علشانهم وعنيكى معصوبة
ياهل ترى خاينة ولا زيى مغصوبة
و الصبر علو جبال والظلم شئ راسخ
وطن وغرقان فى النطاعه
كل شئ ريحته نطاعه
علمونا بالعصاية
ورضعونا الخوف رضاعة
علمونا نخاف من الناظر فيتمنع الكلام
علمونا ازاى نخاف وازاى نكش
بس نسيوا يعلمونا الاحترام
فماتزعلوش لما ابقى مش باسمع كلامكم
وماتزعلوش لما ابقى خارج عن النظام
كل اللى بيقولك بحبك دول نفاق
أنا لما قلت لك بحبك كان نفاق
مش ايد بتبنى وستميت تيت تيت يهدوا
الحب حالة
الحب مش شعر وقوالة
الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى احس بقيمتى فيكى إنى مش عايش عوالة
يعنى لما اعرق تكافئيى بعدالة
الحب حالة الحب
مش شعر وقوالة
الحب حاجة ما تتوجدش فى وسط ناس
بتجيب غداها من صناديق الزبالة
الحب جواكى استحاله
وَالْجُوْع يِكْوِينَا وَالْصَّبْرُ مَا كَفّى
وَالْقَلْب لَا يَهْدَا وَالْجُرْح لَا يُشْفَى
وَلِأَنَّنَا طَوْع زِنِّا لَهُم خفّا
جَاءُوَا بِمَوكَبِهم.. واشتغلت الزفة
والكفة مش مايلة علشان مافيش كفة
و جحا اللى جاى بالليل لساه بيتخفى
من جبنه شاف الدود سابه وراح ماشى
ولا اتكسف للناس ولا حس على طوله
الناس عشمها كبير جريوا بيشكوله
ضحك جحا ضحكة مواشى
مادام بعيد عن طينى ... ماشى
بعد ما يمص فى دمانا مش هيحلاله الا طينك
احنا اهلك احنا رجالتك عمادك
إحنا وقت الشدة سندك إحنا زادك
يا جحا احمى ولادك لو كنت عايز تحمى طينك
هامشى ويا الشحاتين وابكى على حلمى اللى تاه
بس مش هاشحت رغيف
هاشحت وطن لله
تعليقات
إرسال تعليق